Членовите на Иницијативата “Стоп за Вардариште” изразија големо разочарање поради тоа што утрово не им беше дозволен влез во депонијата Вардариште. Според нив, причината за оваа ситуација била недостатокот на соодветна дозвола, што дополнително ја нагласува недостигот на соработка меѓу институциите.
“По 26 дена протест, очекувавме дека ќе добиеме дозвола за посета, особено по поканата од градоначалникот. Сметаме дека политичките несогласувања не треба да влијаат на функционалноста на институциите. Важно е тие да работат заедно, без оглед на партиската припадност на функционерите”, изјавија од иницијативата.
Тие забележаа присуство на противпожарно возило и полиција, но само од страната на Јавното претпријатие Лајка. Од друга страна, каде исто така имало можност за пристап, немаше распоредени единици, а на теренот имаше купишта железен отпад. “Депонијата е без ограда, а единствената рампа е од страната на ЈП Лајка. Забележавме и дрон кој леташе, но не во моментот на нашиот пристигнување”, додаваат тие.
Иницијативата истакнува дека на посетата не присуствуваа ни претставници од другите институции, ниту медиуми, и повикуваат на подобра комуникација помеѓу надлежните. “Ги повикуваме сите релевантни институции да се приклучат на нашата средба во понеделник, за да ги презентираат конкретните мерки кои ќе бидат преземени”, велат од иницијативата.
Барањата за акција биле упатени и до општините Гази Баба и Аеродром, Град Скопје, како и до неколку министерства и претседателот на државата. “Сите граѓани кои се загрижени за оваа ситуација се добредојдени на нашата средба. Ние сме подготвени да создадеме простор за конструктивна дискусија, каде што одговори како ‘не е наша надлежност’ нема да бидат прифатени”, додаваат тие.
More Read
Ако не добијат одговор од другите институции, иницијативата најавува засилување на блокадите. “Стоп за Вардариште! Стоп за дивите депонии и загадувањето на воздухот!”, заклучуваат од иницијативата. Блокадата продолжува и утре во 18 часот на истата локација.
