Владата на Република Македонија објави јавен оглас за финансиска поддршка за набавка на инвертер клима уреди за домаќинства кои припаѓаат на категоријата на ранливи потрошувачи на енергија. Огласот е дел од Програмата за заштита на ранливи потрошувачи за 2025 година и ќе биде отворен 60 дена.
Според информациите од ВМРО-ДПМНЕ, за оваа намена се обезбедени 170 милиони денари, а мерката е насочена кон подобрување на животниот стандард на социјално загрозените семејства и намалување на енергетската сиромаштија.
Станува збор за субвенционирање на инвертер клима уреди од енергетска класа А+ со инсталирана моќност од 3,5 киловати, кои ќе бидат директно вградени во домовите на корисниците. Новина е што клима уредите ќе се распределуваат врз основа на месечните приходи на домаќинствата – од најниски кон повисоки – сè до исцрпување на средствата, со што се елиминира досегашниот принцип „прв дојден – прв услужен“.
Од партијата велат дека оваа мерка гарантира дека уредите ќе стигнат до оние на кои им се најнеопходни, обезбедувајќи комфор и енергетска ефикасност во домовите како во летниот, така и во зимскиот период.
Дополнително, ваквата иницијатива има и еколошка компонента – се очекува да придонесе кон намалување на загадувањето, особено во зимските месеци кога традиционалните начини на греење придонесуваат кон зголемување на аерозагадувањето.
More Read
Покрај оваа мерка, Владата обезбедила и финансиска поддршка за делумно покривање на трошоците за потрошена електрична енергија за граѓаните од ранливите категории.
